Kadalanan sa Cebu City butangan og bicycle lane

Gitinguha karon sa konseho sa siyudad sa Sugbu nga kabutangan og bicycle lane ang mga dagkong kadalanan sa dakbayan.

Kini pinaagi usab sa resolusyon nga gipalabang ni Konsehal Nestor Archival atol sa sesyon sa City Council kagahapong adlawa.

Ang City Planning and Development Office maoy giawhag sa konseho pagtan-aw sa posibilidad nga maestablisar ang bike lanes sa kadalanan.

Sa samang higayon giawhag usab sa City Council ang City Engineering Office nga maoy mopahigayon sa profile survey.

Lakip na niini ang pagpreparar unya sa Program of Works and Estimates alang sa nahisgutang katuyoan.

Alang kang  Archival, angayan nang mahatagan og kaugalingong dalan ang mga tawo nga mahiligon sa pagbisiklita.

Kini aron malikayan na ang mga insidente sa kadalanan nga naglambigit niini mugna usab sa pagpataka og sulod sa bisan asa nga linya sa karsada.

“Dinhi sa ato, daghan kaayo ang dunay bisiklita, naa say mga tawo nga nadisgrasya tungod sa pagbisiklita, naa unta ni silay bike lane,” sumala ni Archival.

Gawas niini miingon ang konsehal nga tukma usab karon ang pagbutang og bicycle lane, tungod sa padayong pagsaka sa presyo sa mga produktong petrolyo.

‘Kahibawo baya ta nga lisod na kaayo rong panahona, nagsige ang oil price increase, mao nga panahon na siguro ang paggamit ug bisiklita,” matod ni Archival.

Alang sa konsehal, praktikal na niining panahona ang paggamit og bisiklita kun adunay adtuon aron makadaginot sa gasto sa pamasahe.

Gani niingon si Archival nga sa ubang malambuon nga nasud sa Asya ug Urupa, gigamit gihapon sa mga molupyo niini ang bisiklita.