CCTV cameras sa mga tindahan buot himuong rekisitos

Tungod sa nakitang dakong ikatabang sa security cameras diha sa mga establisamento pagsulbad og dali sa mga kaso sa pagpanulis dinhi sa Sugbu subling giawhag sa kapolisan ang mga konsehales sa dakbayan sa pagpanday og ordinansang himuon na kining rekisitos.

Si Sr. Supt. Patrocinio Comendador mitug-an nga dako og natabang kanila ang nakuhang video footage nga nakuha sa security camera diha sa Oro Sugbu ug Agencia Ann dihang kini gitulis niadtong milabay'ng Sabado.

Sumala pang Comendador duna nay mga lakang nga gihimo kaniadto ang ubang mga opisyales sa dakbayan paghimong requirements sa pag-instalar og security camera kung molukat og business permits apan hangtud karon wala nay nadunggang sunod niini.

Namatikdan man gyud ni Comendador nga matag dunay mahitabong mga pagpanulis dinhi sa dakbayan sagad sa mahisgutang isyu maglangkob sa security cameras.

“Everytime nga naay mga matulis nga establishments this issue is being raised,” asoy pang Comendador.

Sa makuhang video footage mailhan ang mga responsable ug kung giunsa nila ang pamaagi sa pagtulis.

Apan base sa nakuhang footage sa duha ka pawnshops niadtong Sabado diin nakuha ang P13 milyones nga balor sa mga alahas wala gyud kaayo maklaro ang dagway sa mga suspek gawas sa ilang pamayhon.

Matud pang Comendador nga mas epektibo kini kung gawas nga dunay camera nga naa sa ibabaw duna sad untay laing camera nga naa sa ubos nga diin malakip sa ma-cover ang mga dagway sa mga tawong manulod ug mogawas aron mas mailhan pa gyud dayon ang mga suspek.