Ginang patay kay napusilan

Usa ka ginang ang namatay samtang usa ka lalaki ang nasamdan human gipamusil sa usa ka 46-anyos nga lalaki nga miapas sa iyang live-in partner nga milakaw tungod sa ilang panag-away.

Nahitabo kini sa Lower Linao, lungsod sa Minglanilla niadtong Domingo sa alas 5:15 sa hapon.

Si Joan Paquibot, 28, patay nang naabot sa tambalanan, samtang si Romeo Lapure, 47, taga Bayanihan, Basak, dakbayan sa Sugbo, anaa karon sa Vicente Sotto Memorial Medical Center.

Sumala pa ni PO3 Neil Mansueto sa Minglanilla Police Station nga ang suspetsado nga si Luisito Gubilao nagkaaway sa iyang kapuyo nga si Dora Behasa.

Milakaw si Behasa ug miadto sa mga silingan aron magpatambag sa dihang giapas ni Gubilao. Si Paquibot ug Lapure misulay og patunga aron motabang pagpasabot sa duha aron mahilot ang panag-away.

Apan si Gubilao mipusil na hinuon ni Paquibot nga nagtalikod hinungdan nga naigo kini sa bukobuko, samtang gisundan niini og pabuto ang .38 rebolber hinungdan nga si Lapure na usab ang naigo sa dughan.

Human sa hitabo, daling mipahilayo si Gubilao.

Si Paquibot wala na makaabot sa tambalanan nga buhi, samtang si Lapure talandugon karon ang kahimtang sa VSMMC.

Ang kapolisan mopasaka og tukmang kasong pagpatay batok kang Gubilao.