Dalagita nalumos

CEBU, Philippines — Patay ang usa ka 17-anyos nga dalagita nga gituohang nalumos sa Barangay Balud, San Fernando, Cebu, niadtong Lunes sa hapon, Agosto 31, 2026.

Gidala ang biktima sa Cebu Provincial Hospital sa Carcar City apan gideklarar kini nga dead on arrival.

Sumala sa kapulisan, usa ka 58-anyos nga saksi nga giila sa alyas nga Lando ang nakamatikod sa dalagita nga nagkapa-kapa diha sa tubig pasado alas-3 sa hapon samtang nangisda sa maong lugar.

Misulay si Lando sa pagduol aron motabang apan wala siya makaduol dayon tungod sa kalawom sa tubig ug tungod kay wala siyay sakayan.

Gihulat niya nga madala sa sulog ang dalagita ngadto sa mas mabaw nga bahin, diin iyang nadala kini sa baybayon ug nangayo og tabang sa mga residente.

Mitubag ang mga personnel sa Local Disaster Risk Reduction and Management Office ug midala sa biktima sa ospital, apan wala na kini maluwas.

Matud sa police report, alas-8:30 sa buntag ang kataposang higayon nga nakita sa pamilya ang biktima human kini pamahaw ug misaka sa ilang kwarto.

Wala na nila namatikdi kung kanus-a kini mibiya sa balay. Sumala sa kapulisan, wala silay nakitang timailhan nga naay foul play basin a sa ilang inisyal nga imbestigasyon.

Gibutyag usab sa amahan nga adunay kasaysayan sa mental health condition ang anak.

Wala mosugot ang pamilya nga ipa-autopsy ang lawas sa 17-anyos nga dalagita.

Padayon ang pagkuha sa kapulisan og dugang impormasyon aron matino ang tinuod nga sirkumstansya sa pagkamatay sa biktima.—  IBM BANAT NEWS