Tomas di pabor nga sinakmit nga mga sakyanan pang-gubaon

Dili pabor si Mayor Tomas Osmeña nga ipaguba ang mga luhong sakyanan nga gipayuhot ug nasakmit sa Bureau of Customs (BOC) sa Sugbu.

Una nang gipahibawo ni Customs Commissioner Napoleon Morales nga walay probisyon sa Customs and Tariff Code nga mahimong panggub-on ang nasakmit nga mga sakyanan.

Apan ang Cebu Auto Dealers Association  pinaagi sa ilang presidente nga si Jose Manuel Cuenco nabalaka nga mabalik ra gihapon sa mga smugglers ang maong mga sakyanan kung kini isubasta.

Kini tungod kay giingong walay kasiguruhan nga dunay transparency ang ipahigayon unya nga public auction.

Apan alang kang   Osmeña, mas maayo nga idonar ang nahisgutang mga sakyanan ngadto sa kapulisan ug sa ubang buhatan sa kagamhanan.

Sa ingon niini nga paagi niingon ang mayor, nga kini mapahimuslan ug magamit sa paghatag sa gobyerno ug serbisyo ngadto sa publiko.

“Why don’t just give it to the police? Why are we going to demolish these vehicles if they can be used to provide service,” nakapangutana  si Osmeña sa lakang sa CADA nga pagpadala og manipesto ngadto sa Malacañang.

Gani nagkanayon si Osmeña nga ang siyudad nakapangayo na kaniadto og napulo ka mga sakyanan gikan sa BOC nga gigamit sa kapulisan sa dakbayan.

Gipahibawo sa mayor nga laing napulo ka mga sakyanan ang iyang gipangayo sa BOC, aron magamit usab sa kapulisan sa siyudad sa Mandaue.

Apan ang mga car dealer sa Sugbu masaligon nga musugot si Presidente Arroyo sa ilang hangyo pagpaguba sa nasakmit nga mga luhong sakyanan sa BOC.

Gihimong sanglitanan sa mga car dealer mao ang kamanduan sa presidente kaniadto, pagpaguba usab sa mga nasakmit nga mga sakyanan didto sa Subic Free Port. (Elly Bolonos)