Rekoreda vs. dengue himuon sa mga brgy.

Kada adlaw inig abot gyud sa alas kuwatro sa hapon, ang Department of Health (DOH)-7 pinaagi usab sa pag-abag sa mga  opisyales sa barangay sa dakbayan sa Sugbu, mohimo kini og rekoreda sa matag barangay sa siyudad.

Kini nunot sa paglusad   sa DOH-7 sa ilang Anti-Dengue campaign sa tibuok Central Visayas.

Matud pa ni Dr. Jocelyn Abellana, hepe sa communicable division sa DOH-7, atul sa rekoreda ilang ipakita sa publiko ang masscot sa Aedis Egypti, carrier sa sakit nga Dengue.

Midugang si Dr. Abellana nga posibling human sa pagpahigayon og rekoreda sa mga kabarangayan sa dakbayan sa Sugbu, isunod nila pag-rekoreda ang mga kalungsoran sa lalawigan.

Samtang subling gipahibalo ni Dr. Joseph Tagli, dengue program coordinator sa Department of Health nga adto mo-itlog sa limpyong tubig ang Aedis Egypti.

Apan giklaro hinuon ni Tagli nga dili tanang Aedis Egypti carrier sa sakit nga dengue.

Gipasabot niya nga mahimo lang carrier sa dengue ang usa ka Aedis Egypti sa higayon nga makapaak kini og usa ka tawo nga nasakit sa dengue.

 Matud ni Tagli nga mailhan lang ang Aedis Egypti pinaagi sa kolor niini nga puntik-puntik, kolor puti ug itom.

Nidugang ang doktor nga kini klase sa lamok mamaak sayo sa buntag ug alas kuwatro sa hapon pataas.