P24 mil nakuha sa tulisan gikan sa 36-anyos ginang

Way nahimo ang usa ka 36 anyos nga ginang human yano lang kaayo gikuha sa nag-inusarang tulisan ang iyang  P24 mil  nga kwarta niadtong Sabado sa udto diha sa dalan Pelaez, barangay Kamagayan ning dakbayan.

Ang biktima nga midangop sa Theft and Robbery Section giila nga si Alma Rivera minyo residente sa Villa Kawayan, Barangay Inayawan ning dakbayan sa Sugbu.

Base sa imbestigasyon sa kapolisan ang biktima naglakaw kini sa nahisgutang lugar gikan sa usa ka money changer nga nag-withdraw sa  P24 mil  sa dihang gitulis.

Gikatahong ang biktima nga naglakaw sa maong dapit kalit lang giduol sa usa ka tawo nagsul-ob lang ug basketball short ug naka-t-shirt nga  mition kaniya sa wala matinong armas nga gipasalipdan sa sinena.

Ang biktima igo na lang  mitug-an sa kapolisan nga ang suspetsado adunay gitas-on nga  lima ka tiil  ug kasarangan ang pamayhon sa lawas niini.

Human sa maong hitabo ang nag-inusarang suspetsado yano lang usab kaayo kining naglakaw paingon sa dalan Sanciangko.

Samtang ang biktima nga walay nahimo sa pagsukol igo na lang kining nanghupaw ug mipa-blotter sa maong pagpanulis ngadto sa kapolisan. (Guam P. Logroño)