Opisyal sa police imbestigahon kalabot sa “vigilantes”

Duna bay kaila nga “vigilante” ang usa sa mga opisyal sa Cebu City Police Office?

Kini nga pangutanang pangitaan og tubag sa Criminal Investigation and Intelligence Branch, pinaagi mismo sa deputy chief sa Security and Service Group, Sr. Insp. Enrique Samosa.

Ang maong lakang sugdan karong adlawa, human usab usa ka babaye nga ginganlan og Josephine Gallardo nga taga barangay Sambag Dos mipasangil kang Samosa nga nanghulga niya nga putlan siya og liog kun dili niya iatras ang kaso nga estafa batok sa unom ka mga tawo, usa kanila kanhi polis.

Ang giingong pagpanghulga nahitabo mismo sulod sa investigation room sa Waterfront Police Station pasado alas 12 sa udto niadtong Lunes, Enero 7.

Asoy pa ni Gallardo ngadto ni SPO1 Julius Umpad, imbestigador sa Station 3 nga nagkanayon matud pa si Samosa ngadto niya nga, “Sayon ra pag-ana (senyas og putol sa liog) og tawo. Dali ra pagtawag og vigilantes. Daghan ko og connection.”

Mialegar usab si Gallardo nga gihangyo siya sa maong opisyal sa pag-ingon, “Sige lang maam pasayloa lang na siya, ako lay bahala ana niya, deputy man ko dinhi sa una.”

Ang paghangyo gikatahong nagsugod   niadto pang Domingo sa buntag, diha sa iyang panimalay sa barangay Sambag kalabot sa kasong iyang gisang-at batok sa unom ka tawong “mangingilad” nga nadakpan niadtong Sabado sa hapon diha sa F. Gonzales St., barangay Sto. Niño.

Base sa blotter sa Waterfront Police sila si kanhi polis Pablo Tiempo, mga kaubang sila   si Corazon Cairo, Analiza Gonzaga, Rodrigo Tubil, Dominador Dagondon Jr. ug usa ka 16 anyos nga lalaki, nakasapi og P1, 513, gikan kang Gallardo sugod pa mga duha na ka tuig ang milabay.

Mga tinubdan sa Banat News miingon nga sila Tiempo ug Samosa maoy managhigala sanglit managsama sila nga kanhi sakop sa Philippine Constabulary hangtud na nga nagkauban na sila isip mga polis.

Asoy ni Gallardo, nagtinabangay ang mga suspetsado pagkumbinsi niya og palit og Chinese envelope o “ ampao” nga matud pa nagtangag og numero sa lotto nga maoy modaog nianang pagkasunod adlaw  ug duna usab kini pakapin nga ‘capsule” nga matud pa gipatuo nila nga makaayo bisan unsa nga matang sa balatian.

Una siya nga nabiktima matud  pa niadtong Enero 2006 diin nakahatag siya P475, ug nasundan niadtong August 2007 diin nakabayad siya og P468. Matud pa, aron iyang mapadakop ang mga suspetsado, mituyo lamang gayud siya og palit niadtong Sabado sa hapon diin nakahatag na pud siya og P570.

Ang kasong estafa gipasaka na ni Gallardo kagahapon.

Dungan niini, si City Police deputy director Supt. Paul Labra, nanawagan kang Gallardo pagduso og pormal nga reklamo diha sa buhatan sa Internal Affairs Service kalabot sa giingong pagpanghulga ni Samosa, ingon man sa pagpasaka og kasong criminal  batok sa nahisgutan nga opisyal.

Gitakda usab nga ipatawag si Samosa sa CIIB karong adlawa aron paghatag og katin-awan sa gipasangil nga hulga nga naghisgot og “vigilante.”

“As to the allegation of vigilantes we will look into it. We will call him (Samosa) to the office of CIIB so that he could shade light about it,” nagkanayon si Labra ngadto sa Banat News kagabii.

Gisuwayan og kuha ang habig ni Samosa kagabii, apan pakyas.

 Kahinumduman nga miabot na og 184 ang gipamatay sa gidudahang “vigilantes” nga naglihok dinhi sa dakbayan sukad pa niadtong December 2004, apan walay bisan usa ka mamumuno ang nasikop.