“Council of Elders” ni Cortes gisaway ni VM Fortuna

Hugot nga gisaway sa konseho sa dakbayan sa Mandaue ang giumol ni Mayor Jonas Cortes nga “council of elders” nunot sa  pagpadayag nga ang maong pundok walay igong katungod nga molabaw pa sa mga opisyal sa city hall.

Naghimo kini og mga panagtigom alang sa paghisgot uban sa mayor sa mga mahinungdanong isyu ug ang paghimog mga lakang nga  sama sa pagmando nga  pagbakante sa Mandaue Comprehensive National High School annex ug pagbalhin sa main campus.

Si Vice Mayor Carlo Pontico Fortuna ug mga kauban niya sa konseho ang mipadayag sa ilang pagsaway dihang ilang nasayran nga gipadad-an og summon ang mga city official sa maong pundok.

“They are practically operating and exercising authority over our officers without being accountable to the city and the people,” nagkanayon si Fortuna.

Si Fortuna miingon nga ang grupo sa panahon sa ilang panagtigom daw adunay awtoridad nga labaw pa sa gipatawag nga opisyal  nga kinahanglan mohatag sa ilang pagpasabot.

Ang pipila ka mga sakop sa council of elders ni Mayor Cortes  naglakip kanila ni Retired Judge Lorenzo Paradiang, Retired Department of Education Official  Dr. Susana Cabahug, Retired Provincial Engineer Vitaliano Tacudin, Zoilo Cortes ug uban pa.

 Si Cortes sa iyang pagpasabot miingon nga iyang giumol ang council of elders isip pagsunod sa tambag sa Department of Interior and Local Government.

Matud pa niya nga bag-ong gipili nga mayor makahimo sa pagporma og transition team alang pagtabang sa pasiunang paghan-ay sa iyang administrasyon.

Si Cortes mipasabot nga ang kaakohan sa giumol niyang council of elders mao lamang ang paghatag og rekomendasyon apan ang final decision gikan gihapon kaniya.

Gitataw niya nga ang maong mga sakop sa council of elders nga iyang giumol ang nagserbisyo nga wala magdawat og bayad gikan sa kagamhanan sa maong dakbayan.