FESAGSS-7 gipasidunggan na usab

Sa ikalimang higayon, nakadawat og pasidungog ang  Firearms,Explosives and Security Agencies Guards Supervisory Section-7 isip Best FESAGSS of the Year ug gilupigan nila ang laing pang 15 ka mga FESAGSS offices sa tibuok nasud.

Ang maong buhatan nga gidumala karon ni Supt. Rey Lyndon Lawas nasakop  sa  Police Regional Office 7 ug ning bag-ohay lang gipasidunggan sa  Civil Security Group sa Philippine National Police.

Ang kompetisyon gibase sa  administrative ug operational nga mga aspeto nga gilangkuban sa pagpanglisensya sa mga armas, mga gwardiya ug security agencies sa rehiyon.

Sumala pang Supt. Anthony Obenza, ang Deputy Chief sa Regional Police Community Relations Division sa PRO-7, ang FESAGSS-7, gipasidunggan gumikan sa maayo nilang sistema, proyekto ug uban pa alang sa pagpatuman sa hingpit sa mga balaod sa pagbaton og armas, eksplosibo ug sa mga gwardiya.

Ang maong mga gimbuhaton nakatampo og dako sa pagkolekta og kwarta gikan niini nga nakatabang sa panudlanan sa gobiyerno.

Ang pasidungog gihatag niadtong ika-27th Founding Anniversary Celebration sa Civil Security Group diha sa Camp Crame niadtong Oktobre 22 nga gitunol ngadto kang  Lawas ni Representative Ignacio Arroyo,Jr. kinsa maoy  Guest of Honor ug Speaker sa maong kalihukan.

Ang  FESAGSS-7 maoy nidawat kaniadto sa 2001, 2002, 2004, 2005 nga Best FESAGSS of the Year ug ingon man ang sa karong tuiga, ang tulo niini nadawat sa maong buhatan ubos sa pagdumala na ni  Lawas.