Polis nga natulog nag-drive sa patrol car silotan

Polis nga nakatulog nga nagmaneho sa patrol car nga mibangga ngadto sa railings sa tunga sa karsada sa miaging adlaw diha sa Tipolo, dakbayan sa Mandaue gipahamtangan og “preventive suspension”.

Si PO2 Gil Tomada gidestino isip drayber sa Hi-Lux patrol car sa Mandaue City Mobile Group (MCMG) gipaubos sa camp restriction dungan sa pagpahamtang og bali’g usa ka buwan pagka-suspenso.

Niadtong Domingo paingon na untang dad-on sa shop ang patrol car ni PO2 Tomada apan pag-abot sa may Tipolo iyang gidaro ang railings nga nakabutang sa tunga-tunga sa karsada.

Si Sr. Supt. Rodel Calungsod atol sa 888 news forum diha sa Del Sol Restaurant sa Waterfront Hotel sa Lahug mitug-an nga iyang gipaimbestigar si PO2 Tomada tungod kay ang gibuhat sa naulahi  usa ka serious irregularities of performance of duty ug kini nag-atubang karon og kasong administratiba.

“Grave offense ang iyang gihimo unya pinakagamay anang silot balig tulo ka bulan nga pagkasuspenso,” dugang asoy ni Calungsod sa dihang nahinabi sa Banat News kagahapon.

Matud ni Calungsod nga mura’g gisungog gyud sila sa panahon tungod kay lima ra ka buok ang ilang patrol car unya nabangga pa gyud ang usa.

Nunot niini naproblema si Calungsod tungod sa kadako sa maong damage sa sakyanan nga moabot ngadto sa P150,000 kun asa siya mangita sa maong kantidad nga gani nasayod siya sa kakuwang og pundong salapi sa kapolisan.

Si PO2 Tomada mirason human sa pagkabangga sa sakyanan nga wala niya tuyoa tungod kay nakatulog siya niadtong higayona.

Apan si Calungsod nagkanayon nga dili siya motuong nakatulog nga nagmaneho si Tomada ug labaw pang dili siya motuo nga hinay lang kini nga nagpadagan base sa resulta sa damage sa sakyanan.

Matud pang Calungsod nagduda siyang kusog gyud ang pagpadagan ni Tomada gikan sa 60 ngadto sa 80 kilometer per hour tungod kay sayo pa kini sa buntag nahitabo.