Nalupigan sa layugay traysikad driver patay

Patay ang usa ka drayber sa traysikad human kini dunggaba sa laing drayber usab sa traysikad gamit ang plamingko niadtong Lunes sa hapon diha sa Barangay Tabunok dakbayan sa Talisay.

Ang biktima giila sa mga polis nga si Leoncio Tanza, hingkod ang panuigon, residente sa maong lugar kinsa nakaangkon og duha ka samad dinunggaban sa walang bahin sa iyang dughan ang daling gidala ni Raulfo Rabaya, tanod sa barangay diha sa Talisay district hospital apan gideklarar, kini sa doktor nga patay na nga naabot sa maong tambalanan.

Ang suspetsado giila usab sa mga polis nga si Roberto Leray, hingkod usab ang panuigon, taga Barangay Lagtang sa maong dakbayan ang daling miikyas human sa maong hitabo ug padayon pa kining gipangita sa mga polis.

Si PO2 Erwin Carbonquillo kinsa maoy miimbestigar sa insidente mibutyag sa Banat News nga ang duha gikatahong mga maldito diha sa lugar ug pareho kining magmaoy kung makainom.

Sa pasiunang imbestigasyon ni Carbonquillo nga si Tanza ug Leray nagkabangi kini sa milabay’ng mga adlaw ug nianang adlawa giatngan ni Leray si Tanza.

Matud ni Carbonquillo nga nakita sa mga saksi nga si Leray ug Tanza naglinayogay apan nalupig ang biktima sa maong linayogay ug nadunggaban gyud kini sa suspetsado.