Naglaslas sa pulso, naghikotg sa liog ang tindera, patay

Patay ang usa ka babaye human maghikog pinaagi sa paglaslas sa iyang pulso sa miaging gabii sa sulod sa gipuy-ang panimalay sa barangay San Isidro, lungsod sa San Fernando.

Giila ang biktima nga mao si Juanita Guingoni, 35 anyos,  ug sinaligan sa tindahan nga gipanag-iya sa negosyante nga si Salvador Bobby Siarsa.

Giingong naalkanse ang tindahan ni Siarsa  nga gibantayan sa biktima nga maoy hinungdan sa paghikog sa kabalaka nga manira ang negosyante sa tindahan niini. 

Si SPO3 Joseph Yongco, imbestigador sa kapolisan sa maong lungsod nga gikahinabi sa Banat News miingon nga napalgan ang patay’ng lawas sa biktima nga nagluhod sa kaligoanan sa ikaduhang andana sa panimalay.

Dugang pa niya nga sa iyang pagsuhid sa sulod sa lawak maoy iyang nasuta nga unang naglaslas sa iyang pulso ang biktima sa sulod sa lawak sanglit nakitang man ang daghang dugo sa katre.

Nagtuo si Yongco nga gibati og kasakit ang  biktima sa paglaslas og blade sa pulso maoy nakaingon sa pagbugkos og panapton ug mipaingon sa kaligoanan ug didto nigamit og pisi aron tiwason ang paghikog.

Si SPO3 Yongco miingon nga natumba ang biktima sa kaligoanan ug wala na makahigot og pisi sa liog ug gituohang nahubsan kini sa dugo ug namatay.

Hinuon si SPO3 Yongco miingon nga ang patay'ng lawas sa biktima ilang gitugyan sa Scene on Crime Operation (SOCO).