Kanhi konsehal posibleng mag-kongresista

Andam og tagana si kanhi konsehal Jocelyn Pesquera nga modagan sa pagka kongresista diha sa south district ning dakbayan sa Sugbu karong umaabot nga piniliay sa tuig 2010.

Si Pesquera nga nahinabi sa Banat News nagkanayon nga kun adunay oportunidad niini karong 2010 nga election iya kining dawaton labi na kun ang iyang mga kaubanan sa Bando Osmeña Pundok Kauswagan (BOPK) mosuporta kaniya.

Sumala pa niini nga wala niya sirad-i ang maong kahigayunan hinungdan nga magpaabot lang una siya kun unsay hukom sa mga kaubanan niya sa BOPK, kini tungod kay layo pa man usab kaayong paabuton ang sunod election.

Hinuon iyang giklaro nga sa pagkakaron bisan pa man kun wala na siya sa konseho nagpadayon gihapon ang iyang pagduaw sa komunidad  isip paglantaw sa iyang mga proyekto nga gipatuman dihang nahuman ang iyang termino.

Ang konsehal mapasigarbuhon sa iyang paglingkod sa tulo ka mga termino sa konseho diin hangtud karong mga panahuna nagpadayon ang iyang pag-follow up sa iyang proyekto diha sa south district.