Talisay Vet mihimakak bahin sa nangawagtang nga ekipo sa ihawan

Si Galileo Larawan, Talisay City Veterinarian ug Supervisor sa ihawan sa Talisay ang mihimakak sa giingong mga nawagtang nga mga ekipo sa ihawan.

Si Larawan sa pakighinabi niini sa Banat News kagahapon sa buntag sukad sa iyang paglingkod niadtong Mayo 2005 sa ihawan isip supervisor  wala siya makakita sa mga nahisgutang ekipo.

Ang mga nawala nga ekipo mao ang meat grinder, meat mixer ug patty former.

Matud ni Larawan nga ang city engineering mideklarar nga kompleto ang maong mga ekipo sa ihawan dihang gitugyan kini sa contractor nga AVM Bernardo Engineering.

Apan si Talisay City Engineer Audie Bacasmas nagkanayon sa pakighinabi niini sa Banat News nga kompleto gyud ang ihawan sa mga ekipo niini dihang gitugyan kini sa contractor niadtong Septiyembre 2005 ug gani aduna pay gipahigayong dry run sa mga ekipo.

Ang maong kalapasan nahibaw-an dihang ang Commission on Audit mipahigayon og pakisusi.

Base sa annual report sa COA nga nanobra ang gibayad sa Talisay sa contractor  sa maong ihawan og sobra sa P5.8 milyones.

Sa 2006 nga report sa COA nasuta nga ang dakbayan migasto og P49.9 milyones sa ihawan diin gisugdan kini sa pagtukod niadtong tuig 2002-2004.

Base sa  report ni Sheila Villa, Assistant Cluster Director sa COA nga ang AVM Bernardo Engineering napakyas sa pagkompleto sa construction diin 11.6 porsiyento ang kuwang niini nga mokabat sa P5,838,362.93 ang kantidad.

Sa gipahigayong pakisusi sa COA Technical Service Office niadtong tuig 2005 nasuta nga walay hog-line ug meat processing equipment sa mga ekipong nahanaw ang nahatag sa contractor.