Anti-SONA rally malinawong himuon sa Bayan

Usa ka malinawon nga rally   ipahigayon karong sayo sa buntag sa mga sakop sa Bayan Muna ug ubang militanting grupo isip pagtugbang sa State of the Nation Address (SONA) ni Presidente Gloria Macapagal Arroyo.

Matud pa ni Arman Perez,  secretary general sa Bayan Muna Central Visayas nga sugdan nila mga alas  9 sa buntag pinaagi sa pagtapok diha sa Fuente Osmeña dayon sundan og martsa ngadto sa Colon area ning dakbayan sa Sugbu.

Si Perez miklaro nga ilang gipanghinaot sa grupo nga magmalinawon ang ilang ipahigayong lihok protesta sa ingon mapabati nila sa katawhan ang tinuoray’ng isyu labot sa kahimtang sa nasud subay sa gipatuman nga Human Security Act ug ang ngpadayong kakabus sa katawhang Pilipinhon.

Gipasabot niini nga ang  rally magsentro sa gipatuman nga anti-terrorism law ni Arroyo diin alang kanila inutil kini tungod kay sa unom ka tuig nga pagdumala sa presidente nga wala pa kining maong balaudnon ug hangtod na sa pagpatuman niini  nagpadayon man usab ang pagkalig-on sa mga teroristang grupo diha sa Mindanao.

Matud pa niini nga kun mahinunduman, ang presidente mipagawas og usa ka bilyon ka pesos alang sa modernization program sa Armed Forces of the Philippines niadtong 2005-2006 apan napalpak kini gumikan sa korupsyon.

Gani ang makapamatuod niini ang mga surplus nga kagamitan sa kapolisan ug militar hinungdan nga ang mga ipamulong niini sa SONA wala gyuy kamatuoran.

Sumala pa niini nga makaayo unta kun ang gobiyerno ni Arroyo mosentro kini sa ilang programa sa Social Services inay sa pagpatuman sa Human Security Act nga makahatag kini unyag daghang mga kalapasan sa tawhanong katungod sa mga sibilyan.

Si Perez miingon nga mga progresibong grupo nagpasalamat ni Supreme Court  chief Justice Renato Puno sa gipatawag niini nga Extra-Judicial Killings Summit didto sa kauluhan diin  nag-awhag sa gobiyerno  nga seryosohon ang pagtubag ang mga problema sa extra-judicial killing nga  nagsaka ang gidaghanon matag tuig.