Kampaniya batok ilegal nga drugas hingusgan-UNI-MAD

Nagtinguha ang United Movement Against Drugs (UNI-MAD) nga mabutangan og rehabilitation center ang matag rehiyon sa nasud alang sa mga kabus nga biktima sa ilegal nga drugas.

Kini ang nag-unang programa sa UNI-MAD sa higayun nga makapalingkod kini og representanti ubos sa partylist system sa Kongreso.

Matud pa ni Antonio Rom, founding chairman sa UNI-MAD, nga hingusgan usab ang awareness seminars batok sa ilegal nga drugas sa mga tunghaan.

Gawas sa mga batan-on, lakip sa hatagan sa seminar ang mga ginikanan kinsa kadaghanan maoy gibasol nga natumpawak ang ilang kabataan sa dautang bisyo.

Gidasig usab sa UNI-MAD ang mga relihiyosong pondok sa pagtabang sa pag-atiman sa mga kabus nga biktima sa ilegal nga drugas sa higayun nga makagawas na kini sa rehabilitation center.

Ang UNI-MAD partylist suportado sa Kilos Laya Laban sa Droga (KILL Droga) Movement ug sa National Association of Protective Security Operative Groups ug maoy bugtong partylist nga makasalmot sa eleksiyon nga nakigbatok sa ilegal nga drugas.