Bolo wala kadulot sa buhok biktima nakaikyas

Naluwas gikan sa posibleng kamatayon ang usa ka batan-ong mamuhatay og puso diha sa sitio Huyong-huyong sa Alaska-Mambaling tungod sa iyang buhok.

Kini dihang ang biktimang si Rodrigo Cabañero,21, residente sa maong lugar gitigbas ug gipusil sa magsuong sila si Ruchel Cabo,18, ug Jerome Cabo nga iya ra usab silingan.

Sa imbestigasyon sa Homicide Section, sumala pang SPO2 Jay Yballe, ang biktima kasamtangang nangandam sa negosyo niining mga linutong poso dihang kalit nga miabot ang mga suspek.

Gikatahong si Ruchel kalit lang miduol kaniya ug mitigbas sa iyang ulo apan swerteng wala makadulot sa iyang taas nga buhok ang sundang ug nakahigayon kini sa pagtukmod sa suspek.

Bugtong bukol nga agi sa sundang diha sa iyang ulo mao ray iyang nahiaguman.

Apan niining tungora ang igsuon sa suspek nga si Jerome kinsa nagdala usab og usa ka pugakhang kalit mipusil kaniya apan sa ikaduhang higayon naluwas gikan sa kamatayon ang biktima dihang wala mobuto ang armas.

Si Cabañero daling mikaratel og dagan sulod sa ilang balay ug nanirado samtang ang mga suspek dali usab nga nangikyas palayo sa dapit.

Sa wala pa ang pag-atake gikatahong misulti ang usa sa mga suspek ngadto kaniya og "Puslan man nga wa mi kabawos sa kontra sa among papa ikaw nalang ang among iunong," asoy pa sa biktima ngadto sa mga polis.

Si Cabañero nagkanayon nga wala siya makaila sa tawong gikakontra sa amahan sa mga suspek nga giilang usa ka Mario Sajitas. Si Sajitas maoy gitumbok nga mipusil sa amahan sa mga suspek nga si Chrisanto Cabo,Jr.43, niadtong Lunes sa hapon.

Si Chrisanto ug Sajitas gikatahong nagkalalis diha sa maong dapit ug kalit lang nga gipusil ni Sajitas. Si Sajitas dali usab nga nakaikyas samtang namatay si Chrisanto tungod sa igo niini sa tuong kilid sa lawas agi sa wala matinong kalibre sa armas.