Mary Ann garbo nakapatunga sa mga Ouano

Gipasigarbo ni Lahug Barangay Captain Mary Ann delos Santos nga tungod niya pormal nga nagkabalik ang maayong relasyon sa pamilyang Ouano diha sa Mandaue.

Kagahapong adlawa nagpatawag og press conference si Thadeo Jovito "Jonkie" Ouano sa pinuy-anan mismo ni delos Santos sa Lahug aron pasalamatan ang kapitan sa pagtabang og patunga aron mahilot ang panagbangi tali ni Mandaue City ABC President Jovita Tuela "Joy" Ouano ug Mandaue City Mayor Thadeo Ouano, amahan ni Jonkie.

Matud ni delos Santos igo lang niyang gipamatud-an nga lig-on ang barangay justice system sa Lahug ug kamatuoran niini nakatampo pa kini sa pagtabang aron mahilot ang panagsungi sa pamilyang Ouano.

Si delos Santos mitug-an nga iyang suod ang pamilyang Ouano tungod kay paryente niya ang bana kaniadto ni Joy nga si Dondi Mangubat ug ang amahan pa sa kapitan maoy nangatubang kaniadto ni kanhi Mayor Alfredo "Pedong" Ouano dihang nagpakasal si Joy.

Nasayran nga ang Lahug pinaagi sa pagdumala ni delos Santos duha ka higayon kining napili nga Most Outstanding Lupong Tagapamayapa lukop nasud.

Apan gipadayag ni delos Santos nga walay kolor politika ang iyang gihimo tungod kay personal nga problema sa usa ka pamilya ang iyang gihatagan og pagtagad nga masulbad.