Lima ka sakop sa SP M'daue wala katambong sa sesyon

Hingpit na nga napasar sa konseho sa dakbayan sa Mandaue ang P379 milyones nga supplemental budget sa siyudad bisan pa og napakyas sa pagtambong sa espisyal sesyon ang presiding officer nga si Bise Mayor Amadeo Seno ug ang upat ka konsehal.

Ang maong kantidad maoy dugang nga gahin sa kagamhanan sa dakbayan alang sa kaugmaran sa merkado publiko nga gikatakdang mahuman sa Hunyo karong tuiga.

Si Konsehal Carlo Fortuna, majority floor leader maoy nahimong presiding officer sanglit si Konsehal Jonas Cortes nga numero unong konsehal ug si Konsehal Glenn Bercede nga maoy ikaduha lakip sa wala makatambong sa sesyon.

Si Bise Mayor Seno kinsa abogado sa iyang propisyon ang mipadangat og pahibalo ngadto sa ilang sekretarya nga dili kini makatambong sa sesyon sanglit may hearing kini sa korte.

Gawas ni Cortes ug Bercede, sila si Konsehal Elmer Cabahug ug Association Barangay Council Federation President Jovita Tuela Ouano ang napakyas usab sa pagtambong sa maong sesyon.

Si Konsehal Cabahug maoy bugtong oposisyon nga sakop sa konseho sanglit sila si Cortes, Bercede ug Bise Mayor Seno ang kauban man sa Power Team 3 ni Mayor Thadeo Ouano sa 2004 election.

Si Bise Mayor Seno kinsa natapos na ang katapusang termino ang nagtinguha sa pagkandidato alang sa pagka mayor ug si Cortes nga mokandidato usab sa maong katungdanan makig-tandem ni Bercede.

Si Seno ug Cortes maoy giisip nga higpit nga kaatbang nga kandidato sa anak ni Mayor Thadeo Ouano nga si Jonkie Ouano kinsa mokandidato usab sa pagka mayor sa dakbayan ug nakig-tandem usab ni Fortuna nga mokandidato alang sa pagka bise mayor.