Larsian napiit sa away sa CH, Kapitolyo

Wala'y business permit ang pipila ka mga stalls sa New Larsian Barbecue sa may Fuente Osmeña, dakbayan sa Sugbo.

Labi pa nga ilegal ang pagkuha sa kuryente sa mga stalls gumikan kay dili motaod ang Visayan Electric Company (VECO) og linya kun walay business permit ang usa ka establisemento.

Si Michelle Resilla, tag-iya sa Original Siomai sa Tisa mibutyag nga ni-aplay siya og business permit sa Cebu City Hall niadtong Pebrero 6.

Wala makapapirma si Resilla sa tinugyanan sa Office of the Building Officials human wala siya makapakita og clearance gikan sa Veco.

Matud pa ni Resilla nga sa sinugdanan may linya sa kuryente ang iyang stall ug ang mga kasikbit niini.

Apan sunod-sunod nga dunay mibuto sa koneksiyon ug gituohan nga wala kadaug ang linya sa kuryente sa kadaghang refrigerators ug mga de kuryente nga mga gamit sa pangluto.

Katapusan dunay mibuto niadtong Domingo ug matud pa ni Resilla nga wala na moayo ang Veco.

Nunot niini, gikompirmar ni Resilla nga ilegal ang koneksiyon sa kuryente nga ilang gigamit sa mga stalls sa pagkakaron.

Samtang wala'y kasayuran si Atty. Pablo John Garcia, consultant sa Kapitolyo nga maoy tag-iya sa New Larsian Barbecue.

Pakyas ang Banat News sa pagkuha sa pamahayag sa tagdumala sa maong establisamento nga si Provincial Treasurer, Atty. Roy Salubre, sanglit wala kini sa iyang buhatan tibouk adlaw kagahapon.