Tabang sa kabus, dugang proyekto maoy gisaad sa mga kandidato

Tulo ka mga kandidato pagka-mayor sa dakbayan sa Talisay ang nagpadayag na sa ilang mga programa de gobyerno paghaylo sa katawhan aron botohan sila sa umaabot nga piniliay karong Mayo 14.

Kini mao sila si kasamtangang Mayor Socrates Fernandez, konsehal Gabriel Leyson sa Cebu City ug si Jose delos Reyes nga taga Talisay usab.

Hinuon nakapabor si Fernandez pagbatbat sa mga butang iyang ialagad sa Talisaynon ilabi na nga nakita na mismo sa katawhan ang iyang mga nahimo, sulod sa mga katuigan nga siyay nagdumala isip mayor sa dakbayan.

Matud pa ni Fernandez nga gawas sa mga misulbong nga mga proyekto sa Talisay sa panahon ni kanhi Eduardo Gullas nga karon kongresista na sa unang distrito sa Sugbo, may mga kaugalingon na siyang mga proyekto usa niini ang basurahan sa barangay Tapul, mga gipalapdang karsada, gipatukod nga panimalay sa mga eskuwater ug daghan pa.

Si Leyson sa iyang bahin miingon nga wala pa makita sa Talisaynon ang iyang mahimo sa maong dakbayan apan tataw na kaayo kanila nga ang mga kayutaan niyang gipuy-an sa mga Talisaynon ug ang uban gitukorag mga proyekto diha sa maong dakbayan, nagpakita kini nga pasiuna pa lamang, aron pun-an unya niya sa panahong mamayor na siya.

Si Leyson misaad nga ipadayon niya ang Metro Cebu Development Project tungod kay ning maong laraw gilakip niini ang Talisay aron dili mabiyaan sa ubang mga siyudad sa Metro Cebu.

Si Reyes usab nagkanayon nga wa pa gyud siyay agi, apan makita unya sa taga Talisay kon unsaon niya pagpalambo ang kinabuhi ug pagpuyo sa mga kabus kay silay rumbo niyang hatagan og prayoridad unya kon mamayor na siya.

Gituohan sa taga Talisay nga mapun-an pa kining maong mga kandidato ilabi na nga dugay pa tak-opan sa Comelec ang ilang buhatan alang sa mosang-at og certificate of candidacy.