Firewalls, way agianan problema sa BFP

Naglisod ang kabomberuhan sa pagsungasong sa miigong sunog kagahapon sa kaadlawon diha sa mga dalan Lincoln, Plaridel ug Manalili gumikan sa mga walay maayong pagkaplastadang mga firewalls.

Sumala pang SFO2 Felix Romero ang fire investigator sa pakighinabi sa Banat News nga naglisod og abante ang mga bombero sa mga nagdilaab nga edipisyo gumikan kay pag-abot nila sa unahan dunay firewall.

Dili usab sila makalusot sa ubang edipisyong wala pa masunog tungod kay gawas nga sirado duna say mga firewall nga maoy nakababag sa mga bombero nga makasulod sa pikas bahin aron unta mapugngan ang pagkatap sa kalayo ngadto sa mga silingang edipisyo.

Kagahapon ang mga bombero anha nalang sa mga kilid-kilid ug gipaspasan og pawong ang s atubangang bahin sa mga edipisyo apan ulahi na kay sa ilang pag-abante sa sudlonong parte sa dapit ugdaw na usab ang sa tunga-tunga.

"Problema lagi ning mga firewall nga not in proper position, nag-iyahay ra man sila og tukod unya unsaon naman nato na pagsulod kung naay sunog sa tunga-tunga…wala gyud maski nalang agianan sa tawo in between sa mga tindahan, ang ato nalang huwaton nato mapawong ang sa atubangan maong ang mahitabo mahurot gyud kasunog,"asoy pang Romero.

Hinuon dunay mga edipisyong naluwas gyud kagahapon tungod usab sa ilang mga firewalls.

Ang Office of the Building Official maoy gitahasang magsiguro sa kaluwas sa mga edipisyo dinhi sa dakbayan ilabi na kadtong mga fire prone areas.

Usa usab sa mga naproblemahan sa mga bombero kagahapon mao ang kasikit sa mga edipisyo ug walay maagian sa isig ka kilid para sa tawo maong walay laing nahimo ang kabomberuhan kundili ang pagpasirit nalang gikan sa dalan.

Ang maong sunog nga nagsugod og alas 3:58 sa kaadlawon hingpit nga nakontrolar pagkaalas 6:20 ug gilamoy ang 17 ka mga edipisyo.