300 ka aktibistang mga langyaw ang mianhi atol sa ASEAN

Dunay 300 ka mga aktibistang langyaw nga miapil sa lihok protesta atol sa 12th ASEAN Summit anaa na sa watchlist sa buhatan sa Bureau of Immigration and Deportation-7.

Kini ang giluwatang pamahayag ni BID7 Regional Director Geronimo Rosas sa pakighinabi sa Banat News base sa gihimong monitoring sa mga sakop sa BID 7 ingon man sa kaulohan.

Gikatahong moabot 300 ka mga langyaw ang ilang nakita nga anaa sa palibot sa mga lihok protesta ug gani ang uban mipartisipar sa maong rally.

Gisumiter dayon sa BID7 ngadto sa ilang ulohang buhatan ang mga pangalan ug address sa mga langyaw aron mabutang kini sa watchlist sa BID.

Mipasabot si Rosas mahimo gihapong makabalik dinhi sa nasud ang maong mga langyaw kung balido ang rason apan hugot silang monitoron.

Samtang mapasalamaton usab si Rosas sa mga Immigration officers ug agents nga gituyo ug padala dinhi sa Sugbu alang sa paghatag ug dugang personnel sa tugpahanan sa MCIA diin gihulagway kini ni BI Commissioner Alipio Fernandez nga nagmalampuson atol sa ASEAN Summit.