Hulga sa mga militante batok sa oil exploration sa Tañon Strait gipakagamay sa DOE-7

Isip usa ka "sovereign" kon gamhanan nga nasud, ang kagamhanan sa Pilipinas gawasnon sa paggamit, pag-ugmad ug pagtikad sa kaugalingong rekurso niini sama sa enerhiya nga way laing nasud nga makabuot, ug makapanghilabot.

Mao kini ang gitataw ni Regional Director Antonio Labios sa Department of Energy DOE-7 kalabot sa lakang sa mga militanteng grupo nga mihulgang ikiha ang gobyerno sa Pilipinas ngadto sa "international court" kon ipadayon niini ang oil exploration diha sa Tañon Strait.

Matud pa ni Labios nga kabahin sa programa sa kagamhanan ang pagkaplag og kaugalingong enerhiya sama sa petrolyo dinhi sa nasud.

Gani matud pa ni Labios nga mapasalamaton ang kagamhanan niining paningkamot sa Japan Petroleum Exploration Company JAPEX nga modiskobre og tinubdan sa asayte diha sa kadagatan sa Tañon.

Ang kuwang karon sa Japex mao na lang ang pagkompleto sa ilang "enviromental compliance certificate" EEC aron makasugod na silag ladlad sa ilang kahimanan sa kadagatan taliwala sa Pinamungahan ug Aloguinsan pagpaniid sa tinubdan sa sayte dihang dapita.

Apan mihulga ang mga militanteng grupo nga babagan nila kini ug nangayog panabang sa ilang kaubanan sa gawas aron pakgangon ug pugngan ang gobyerno sa Pilipinas pagpadayon sa maong oil exploration.

Usa sa ilang katarungan mao nga maungkag kuno ang panginabuhi sa mga mananagat ning maong lakang sa pagpangitag petrolyo sa kadagatan.

Apan alang kang Labios, way si kinsa mang makababag niini kay katungod kini sa gamhanang nasud sama sa Pilipinas ang pagtikad sa iyang rekurso alang sa kaayohan sa panginabuhi sa iyang mga molupyo.