Mga rebelde sa Cebu nagkahilis

Nagkaanam na og kahilis ang mga rebeldeng komunista nga aktibong naglihok dinhi sa lalawigan sa Sugbo.

Kini ang nasayran gikan ni PChief Insp. Julian Entoma, Group Director sa 703rd Provincial Mobile Group (PMG), nga nagbase sa Lutopan, Toledo City.

Gitug-an ni Entoma nga dul-an sa 20 na lang ka miyembro lakip na ang kumander sa New People's Army nga ginganlan og Ka Yori ang aktibong naglihok dinhi sa lalawigan sa Sugbo.

Si Ka Yori usa ka Cebuano nga maoy mipuli sa napatay sa engkuwentro si Jimmy Badayos tali sa grupo sa mga sundalo niining tuiga didto sa bukiran sa Tabuelan nga maoy nag-operate sa tibuok lalawigan.

Matud ni Entoma nga si Ka Yori mao karon ang Cebu Island Commander sa CPP NPA sa front 2 ug 5.

Gihulagway ang front 2 sa mid-north area ug ang 5 ang south area.

Kini base sa gihatag kanila nga assessment gikan sa Intelligence Community.

Sumala ni Entoma nga naglisod na sa pagpanguha og bag-ong miyembro ang mga NPA nga motipon sa ilang kawsa gumikan kay ang mga tawo kuwang sa pagsalig kanila.

Ila usab nga nasayran diha sa mid-north area nga mohangyo na ang mga tawo sa mga walhon nga dili magdugay sa ilang lugar sa pamasin nga dunay engkuwentro ug maangin hinuon sa crossfire.

Matud pa nga lahi ang estilo karon sa mga komunistang rebelde kun mohimo silag mga pagpangatake sa usa ka lugar.

Nagkanayon si Entoma nga ang mga komunistang rebelde moatake sa usa ka lugar ug ilang imbitaron ang ilang kauban gikan sa Bohol, Negros alang sa dugang pwersa ug ila kini paangayan og armas ug pagkahuman sa pagpangatake ibilin usab ang mga tag-as nga armas.

Sumala pa ni Entoma sa higayon nga walay operasyon ang mga rebeldeng komunista giingong moipon sila sa legal front sama sa rally batok sa gobyerno sa mga kadalanan.

Hinuon gitataw ni Entoma nga ilang na-nuetralize ug walay nakit-an nga mga walhon sa bukiran sa Naga ug Talisay tungod sa ilang gipatuman nga pagpatrolya matag gabii sa mga lugar.