Guwardiya giluba sa pag-umangkon

Security guard gidunggab sa iyang pag-umangkon gumikan lamang sa suga didto sa Purok Bombshell, Babag, Lapu-Lapu sa milabay'ng gabii.

Ang biktima mao si Arlindo Tumulak Bagiuo, 35, sakop sa Regency Security Agency ug nagpuyo sa maong dapit.

Samtang ang suspetsado mao si Jason Sagarino Bagiuo, 21, ulitawo, pag-umangkon sa biktima ug nagpuyo sa susamang panimalay sa iyang uyoan.

Base sa imbestigasyon nga gihimo ni PO3 Manolito Abellanosa sa Homicide Section sa Lapu-Lapu nasuta nga suga ang gilalisan sa manag-uyoan sa dihang buot ipapalong ni Arlindo ang suga kay matulog na kini, apan wala mosugot si Jason.

Sa maong sitwasyon mitumaw ang panaglalis ug misantop sa pagdunggab ni Jason sa iyang uyoan gamit ang usa ka kutsilyo.

Si Arlindo nga samaran sa iyang tiyan dali kining gidala sa Lapu-Lapu District Hospital ug gibalhin sa Vicente Sotto Memorial Medical Center.

Samtang si Jason human sa maong insidente dali kaayong mibiya sa maong dapit ug andam nga mopasaka og kaso si Arlindo batok sa iyang pag-umangkon.