Kanhi konsehal sa brgy gibanhigan patay sa duha ka nagtaptap

Patay ang usa ka kanhi konsehal sa barangay human kini pusila sa duha ka tawo nga nagtaptap nga luwan sa usa ka motor sa Sitio Calmaran, Basak lungsod sa Compostela kagahapon sa hapon.

Ang biktima mao si Brigido Bayon, 59, minyo, lumad sa Sitio Mahagnao, Tag-ube sa maong lungsod, samtang duha ka wala mailhing tawo ang gitumbok nga mipusil samtang ang biktima sakay sa motorsiklo nga gimaneho sa anak nga si Rosauro Bayon.

Base sa pasiunang imbestigasyon ni SPO3 Tirso Lima pag-abot sa Calmaran usa ka motorsiklo ang mikalit og overtake kanila ug ang angkas mibunot og armas dayong pusil sa iyang amahan nga si Brigido hinungdan sa ilang pagkalamba sa dalan.

Si Brigido samaran sa iyang ulo ug sa kilid nga bahin sa iyang lawas agi sa usa ka kalibre 45 nga gigamit sa duha ka suspek samtang si Rosauro ug Angelina (asawa ni Brigido) ang nangapangos ug nabun-og sa kalawasan.

Duha ka kabhang sa kalibre 45 nga bala ang nakuha sa kapolisan diha sa crime scene. Matud pa ni Angelina (asawa) nga wa siya makamatikod nga adunay kontra ang iyang bana sa wala pa mahitabo.