Mga kawani sa Carmen nag-antus kay way sweldo

Samtang suspendido si Carmen Mayor Virginio Villamor, nag-antos usab ang mga kawani sa munisipyo sa walay sweldo.

Kini gumikan kay dili pa makapirma si Acting Mayor Silvestre Damiles sa payroll sa mga kawani sumala pa ni municipal budget officer Dina Barriga.

Matud pa ni Barriga nga andam na mopirma si Damiles sa ilang payroll apan wala pa kini hatagi og authority sa pagbuhat sa maong gimbuhaton sa mayor.

Base sa memorandum ni Sec. Ronaldo Puno sa Department of Interior and Local Government niadtong Agosto 28, 2006, gisuspenso si Villamor bali og 90 ka adlaw.

Ang hukom giluwatan sa Sandiganbayan niadtong Agosto 10, 2006 sa kasong kriminal nga gipasaka batok kang Villamor.

Sa maong memorandum ni Puno, gimandoan si Villamor nga itugyan ngadto kang Damiles ang iyang mga gimbuhaton.

Apan nasayran gikan kang Barriga nga wala pa gihapon mopirma si Damiles sa ilang payroll hinungdan nga wala na sila makadawat sa ilang suhulan hangtud karon.