Padulong sa husay sa brgy. gibunala'g tubo

Imbes mahusay ang panagbangi, gikulata ang usa ka lalaki human kini bun-oga ug gibunal-bunalan og tubo sa managkabanay'ng babaye ug lalaki nga iyang kaaway samtang padulong sa barangay hall.

Ang insidente nahitabo diha sa dalan Katipunan, Labangon ning dakbayan niadtong Lunes sa gabii diin miresulta sa pagkalandig sa biktimang si Ritchie Debalucos, 16, 2nd year high school nga taga Upper Bonbonan sa Labangon sa Cebu City Medical Center.

Gitumbok nga mikulata kaniya mao sila si Robert Alonzo alyas Poloy ug Alona Alonzo pulos hingkod ang panuigon ug nagpuyo sa Salvador Extension sa samang barangay.

Sumala pa sa biktima nga giimbitar siya sa babayeng suspek pangadto sa barangay hall sa Labangon aron husayon ang ilang panagbangi, ang biktima mikuyog usab sa suspek luwan sa usa ka traysikad.

Apan pag-abot sa nahisgutang dapit kalit nga mibabag sa agianan si Robert Alonzo ug gipuspusan og tubo ang ulo ug kalawasan sa biktima makadaghang higayon samtang ang babayeng suspek nagpunay usab og sukmag kaniya.

Human sa iyang pagkalup-og daling nangikyas ang mga suspek palayo sa lugar samtang gidala ang biktima sa Cebu City Medical Center tungod sa mga bun-og nga nahiaguman niini.