Tukorong sam-ang sa Lawaan 1 gisupak

Mga opisyal sa Lawaan 1 supak sa tukoron nga sam-ang diha sa ilang lugar.

Bag-o lang ang konseho sa barangay mipasar og resolusyon kabahin sa ilang pagsupak sa maong proyekto. Kahinumduman usab nga ang mga residente sa lugar miduso og mga reklamo sa mga opisyal tungod sa kabalaka nga maapektohan ang ilang panglawas kun mapatuman gyud sa pagtukod ang sam-ang.

Ang mga kapitan sa ubang Barangay uyon kabahin sa pagpatukod sa Pope John Paul II Garden of Peace Memorial Park.

Apan si Osmundo Manreal, presidente sa Association of the Barangay Captains (ABC) kinsa usa sa miuyon sa proyekto mitataw nga si Kapitan Ronald Lastimosa ug ubang mga opisyal sa Lawaan I maoy dunay dakong katungod sa pag-uyon nga matukod ang proyekto.

Si Manreal nagkanayon nga ang ABC mopasar og resolusyon nga nagpakita og suporta sa proyekto.

Ang proyekto gihatagan na og mga permit sa mga ahensiya sa kagamhanan apan ang mga opisyal sa Lawaan 1 mitataw nga dili sila mo-isyu og permit niini.