37 ka tawo na ang gikiha tungod sa kahugawan

Mokabat na sa 37 ka mga tawo ang napasakaan og kaso sa kagamhanan sa dakbayan sa Sugbo ngadto sa korte ug nalutsan og warrant of arrest gumikan sa ilang paghugawhugaw og pagpataka og labay sa basura sa mga kadalanan dinhi sa dakbayan.

Subay sa gihimong pakisusi sa Banat News ngadto sa buhatan sa City Enforcement Sanitation and Enforcement Team (CESET) nasuta nga ang maong mga tawo nakahimo kini og kalapasan sa City Ordinance 1361 kun pagpataka og pangihi ug paghugawhugaw sa mga publikong lugar ug ingon man sa C.O. 2031 nga kapakyas sa pag-segregate sa mga basura nga malata ug dili malata.

Gibutyag ni Geraldine Nudalo, executive staff sa CESET nga gikan niadtong Hulyo 1 sa milabay'ng tuig hangtod sa petsa 26 ning bulana mokabat na sa P860,500 ang tanang nakolekta gikan sa multa nga nabayran sa mga nakahimo og kalapasan sa nahisgutang mga ordinansa.

Ang P811,000 niini mibayad sa compromise settlement nga pagbayad og tag P500 nga multa ug ang P49,500 didto na mibayad og multa paghidangat sa maong kaso sa korte.

Samtang mikabat sab sa 1,907 ang tanang mga tawo nga nadakpan ug gipaubos sa community service human kini napakyas sa pagbayad sa tag P500 nga multa.

Gibutyag ni Nudalo nga padayon karong gihingusgan sa dakbayan ang pagpanakop niadtong mga tawo nga maghugawhugaw sa mga publikong lugar ug dili motuman sa segregation law aron mapatunhay ang kalimpyo sa palibot sa dakbayan nunot niining nagsingabot nga Asean Summit sa Disyembre nga ipahigayon dinhi sa Sugbo.