Video karera sa Naga, Cebu naghitak; Alarcio nahibalo

Naghitak ang video karera machines sa pipila ka barangay sa lungsod sa Naga.

Kini ang nadawat nga report sa buhatan ni Police Regional Office Director Silverio Alarcio, Jr. gikan sa usa ka molupyo sa maong lungsod sa niaging adlaw.

Gitagoan sa PRO-7 ang pangalan sa tinubdan sa maong kasayuran aron pagpanalipod kaniya.

Gitumbok ang mga barangay North, South ug West Poblacion, Langtad, Balirong ug Naga nga grabe ang operasyon sa video karera machines.

Nunot niini, ang hepe sa Regional Operations and Plans Division sa PRO-7 nga si Senior Supt. Carmelo Valmoria nimando sa Cebu Police Provincial Office sa pagsusi sa maong taho.

Gimandoan ni Valmoria si CPPO Director Vicente Loot sa paghimo og lakang kon masuta nga tinuod ang taho nga nadawat sa buhatan ni Alarcio.

Nasayran nga ang lungsod sa Naga usa sa mga lungsod sa lalawigan sa Sugbo nga wala pa nakaduso og sertipikasyon nga video karera free na ang maong lungsod.-Gregg M. Rubio