Tomas 'miulbo' sa iligal nga sugal sa Pasil kagahapon

Miulbo ang kalagot ni Mayor Tomas Osmeña batok sa mga sakop sa San Nicolas police station ug barangay kapitan sa barangay Pasil human sa pagkasakmit sa 35 ka mga video karera ug moli-moli sa nahisgutang barangay sayo sa buntag kagahapon.

Kini tungod sa kapakyas niini pagsumpo sa suliran sa naghitak nga video karera operation diha sa Sityo Lawis, Pasil nga sakop sa ilang hurisdiksyon.

Ang ronda gihimo pinanguluhan ni Supt. Pablo Labra uban sa mga sakop sa Special Weapons and Tactics, Barangay Intelligence Network ug ubang special units sa Cebu City Police Office.

Ang CIIB nakadawat og impormasyon kabahin sa padayong paghitak sa maong iligal nga sugal nga matud pa ni Labra 'guerilla type' nga operasyon.

Nunot niini gimando sa mayor ang pagtangtang sa binulang allowance sa tanang mga polis sa Station 6 lakip na hepe niini ug mipagawas usab si Osmeña og direktiba kang Acting City Attorney Rodulfo Golez pagbawi sa giisyung armas sa dakbayan ngadto ni Pasil barangay captain Romeo Ocarol.

Gitug-an ni Osmeña nga si Ocarol maoy problema niya sa tanang mga kapitan sa pagkakaron gumikan kay ang igsuon niini ang nalambigit man sa pagpayuhot og gidiling drugas.

Mibahad si Osmeña bisan sakop sa BOPK si Ocarol ug nagsingabot na ang eleksiyon karong sunod tuig dili kini babag aron silutan ang kapitan.

Si konsehal Augustus "Jun" Pe sa pakighinabi sa Banat News mipadayag nga nibalik na usab karon ang suliran sa video karera operation human medyo nilugak og gamay ang kampanya sa siyudad batok niini.

Kaniadto nikonhud kini dihang gipatuman sa mayor ang 100 ka adlaw nga tagal sa mga kapitan sa kabarangayan pagbungkag sa operasyon sa maong iligal nga sugal ug gani dunay ubang mga barangay ang nakahimo gyud og zero video karera operation.