Magtiayon gironda sa Lapu, misis ra ang nasikop

Magtiayon nga apil sa gironda sa kapolisan sa dakbayan sa Lapulapu ug nakuhaan og ilegal nga drugas ug video karera, ang asawa lang ang nasikop didto sa Marigondon sa milabay'ng adlaw.

Base sa search warrant nga giluwatan ni Lapulapu City RTC Branch 27 Judge Geraldine Faith Econg, ang subject nga si Virgilio Berdin nakasibat samtang ang nasikop mao si Rowena Book Berdin.

Matud pa ni Insp. Francisco Baguio sa intelligence section sa kapolisan sa dakbayan sa Lapulapu nga atol sa ilang pagronda sa panimalay ni Berdin nakabantay kini hinungdan nga nakaipsot kini kanila.

Sa paghiling sa mga kabtangan ni Berdin inubanan sa mga opisyales sa Marigondon ni pinanguluhan ni Konsehal Michael Bering, nakuha ang upat ka gagmay'ng pakete sa gituhoang shabu, pito ka plastik sachet nga dunay mga shabu residue, mga kagamitan sa pagsuyop og shabu ug usa ka unit sa video karera.

Atol usab sa pagronda naaktuhan usab si Junard Bael Tumulak nga nagduwa sa video karera hinungdan nga giapil kini og signit sa kapolisan lakip na ang asawa ni Virgilio nga si Rowena ang gitumbok nga caretaker sa maong karera gisikop usab sa kapolisan.

Ang mga ibedensiya gisumiter na ngadto sa PNP crime laboratory ug posibleng karong adlawa mapasaka ang kaso sa kalapasan sa RA 9165 bisan pa at-large si Virgilio Berdin.

Samtang si Rowena Berdin ug Junard Bael nga nadetiner sa kapolisan sa Lapulapu pasakaan usab og kasong kalapasan sa ilegal nga sugal ngadto sa piskaliya.