Newsboy gi-ulo sa vigilante

Gipusil una sa kalawasan dayong gitiwasan diha sa ulo sa mamumuno ang usa ka newsboy nga giingong ex-convict sa Bagong Buhay Rehabilitation Center kagahapon sa buntag diha sa dalan Salinas Drive atbang sa usa ka dakong mall sa barangay Lahug ning dakbayan.

Gituohang mga sakop sa mga gidudahang vigilante ang mamumuno sa biktima nga pulos nagtaptap ug naghelmet luwan sa motorsiklo nga armado og kalibre 45 nga pistola.

Ang biktima giilang si Eduardo Cuesta, 39, molupyo sa Mojon, Banilad dakbayan, Mandaue apan diha manginabuhi sa gikahitaboan sa iyang gamay'ng newstand ug nag-sideline usab pagkahabal-habal driver.

Base sa imbestigasyon sa Homicide Section ang kasamtangang naglingkod sa iyang tindahan dihang kalit nga miabot ang mga suspek, ang backrider nga nagsuot og itom nga jacket maoy nanaog ug kalit nga mipusil kang Cuesta.

Si Cuesta bisan samaran naninguhang makadagan palayo apan gigukod kini sa suspek ug gipusil pag-usab, giingong human mahagba ang biktima gitiwasan pa kini sa mamumuno dayong gibiyaan.

Ang mga suspek daling miikyas subay sa dalan Salinas drive ug wala na igkita sa kapolisan. Nakuha sa Homicide Section ang pito ka basiyo sa kalibre 45 nga bala ug duha ka slug diha sa crime scene.

Nasayran sa Homicide Section gikan kang Lenny Acosta, ang kapuyo sa biktima nga sulod-gawas na sa BBRC ang iyang kapuyo gumikan sa kasong pagpangawat kaniadto.