Reklamo batok sa kompanya gibasura sa Talisay City

Gibasura sa kagamhanan sa Talisay tungod sa kakuwang sa ebidensiya ang reklamo sa mga residente sa dakbayan batok sa EDJ Fine Furniture Exports, Inc. ug Superior Products Export Import Inc. nga nahimutang sa Barangay Cansojong diin nasakop kini sa City Land Use Plan (CLUP) sa siyudad nga usa ka residential zone.

Ang mireklamo mao sila si Dr. Nieva Hermosisima, Rheia Gabisan, Marybeth Nadal, Laura Paires ug Maricar Leoligao mihangyo sa kagamhanan sa dakbayan sa pagpasira sa kompaniya.

Ang nahisgutang mga residente mipasangil sa maong kompaniya kinsa gidumala ni Prospero Bacho nga nakahatag og kadaot sa ilang panglawas ang operasyon niini tungod kay wala kini mogamit og Air Pollution Control aron makontrolar ang abog ug ang kabaho sa mga pintura nga gigamit sa furniture nga gigama niini.

Niadtong Pebrero 12, 2004 sa gipahigayong Technical Conference sa Environmental Management Board (EMB) ang nahisgutang kompaniya mipakita og Air Pollution Control.

Apan matud pa ni Bacho nga niadtong Enero 6, 2004 mipahigayon og inspeksiyon ang EMB ngadto kanila diin aduna na silay gi-install nga mga ekipo pagkontrolar sa polusyon ug abog.

Si Bacho nagkanayon nga dunay laing mga kompaniya sa lugar nga nagbuhat og pareha sa ilang produkto apan wala kini ilakip pagreklamo sa mga residente.

Si Bacho midungag nga gihunong na nila ang mga stoneworks diin gibalhin na nila kini diha sa lungsod sa Minglanilla ug sa Barangay Labangon niining dakbayan.