Pasalig sa Militar Visayas di sayon sudla'g terorista

Gipasalig sa militar nga ang Visayas maoy labing luwas nga lugar sa tibook nasud nga malisod sudlan og mga teroristang langyaw.

Matud pa ni Lt. Col. Jefferson Umandam, tigpamaba sa Central Command sa Armadong Puwersa sa Pilipinas, nga ang Kabisay-an gilibotan sa mga isla ug dali ra kaayong masayran kon may mga tawo nga dautan og lihok.

Sa tulumanon "Kalinaw Yawe sa Kauswagan" sa DYMR Radyo ng Bayan Cebu, gipasabot ni Umandam nga ang Visayas lahi sa Mindanao, diin tua didto ang daghang lasang ug dali rang makatago ang mga tawo nga terorista.

Sa Kabisay-an walay katagoan tungod kay dili kaayo baga ang kalasangan nga sarang makapanalipod sa mga rebelde.

Ang maong pamahayag gihimo ni Umandam aron pagwagtang sa kabalaka sa kadaghanan kalabot sa giingong isunod sa mga terorista pagpamomba ang Pilipinas human sa Bali, Indonesia.

Gani ang kadagkoan sa simbahan mipasidaan na sa mga katawhan sa dili pagkompiyansa karong panahona sanglit anha mamomba ang mga terorista sa daghang pundok sa katawhan sama sa simbahan sa panahon sa pagsimba.

Si Arsobispo Ricardo Cardinal Vidal miawhag na sa tanang maninimba paglingilingi pirme sa luyo sa panahon nga mogawas ug mosulod sa simbahan aron dili masugamak sa mga terorista.

Apan matud pa ni Umandan nga dili mabalaka ilabi na ang taga Cebu tungod kay ang mga teroristang magpanagana usab sa paghimog dautang lihok sa mga dapit nga naa ang kapolisan ug kasundalohan.

Dinhi sa Cebu, moagi pa sila sa tugpahanan sa Mactan kon mag-eroplano sila, ug pantalan kon magbarko ang mga terorista ug kon magsakay silag pumpboat, naay mga helikopter sa militar nga kanunay nagbahasbahas sa kahanginan ug barko sa Philippine Navy nga naggabas-gabas sa kadagatan.

Busa dili makahuygo ang mga terorista dinhi sa Sugbo, matud pa ni Umandan.