Anak sa retiradong opisyal sa air force nakuhaa'g shabu

Anak sa usa ka retiradong opisyal sa Philippine Air Force gidakop uban sa iyang mga barkada diha mismo sulod sa Mactan Benito Ebuen Airbase compound gumikan sa ilegal nga drugas.

Ang mga suspek giilang sila si Lou Bragat ug kapuyo niining si Claire Medallo diha sa Airmen's Village sa barangay Pajo dakbayan sa Lapu-Lapu, samtang lakip sa gidakop mao ang usa ka sakop sa Alpha Kappa Rho nga si Daryl Ragudos.

Ang grupo ni Inspector Francisco Baguio armado sa search warrant nga giisyu ni RTC Branch 27 Judge Geraldine Econg gumikan sa kalapasan sa paghupot og ilegal nga drugas.

Nakuha gikan sa maong ronda ang tulo ka paketeng may sulod nga gidudahang shabu, mga drug paraphernalia, cash nga P120, duha ka buhing bala sa kalibre 9mm, ug ID ni Ragudos sa Akhro.

Ang tulo kasamtangan karong gitanggong ngadto sa Lapu-Lapu police station.