Di isyu ang donasyon sa simbahan - Tomas

Dili angay nga himuong isyo ang pagdawat og donasyon sa Simbahang Katoliko sa Sugbo gikan sa kita sa Philippine Amusement Gaming Corporation (PAGCOR).

Kini maoy paghulagway ni Mayor Tomas Osmeña human iya usab nga gihulagway nga dili makiangayon ang paglambigit sa Arsobispo Ricardo Cardinal Vidal sa isyu nga pagdawat og donasyon sa kita gikan sa mga legal nga sugal sa Pagcor.

Kini tungod kay dili man magsukitsukit ang simbahan kun diin gikan ang mga madawat niining donasyon.

Gihulagway ni Osmeña ang Simbahang katoliko sa Sugbo nga maoy labing aktibo sa pagsupak sa pag-legalisar sa tanang ilegal nga sugal.

Giangkon ni Osmeña nga nasagmuyo siya kun nganong gi-apil-apil pa ang Cardinal ning isyu nga pagdawat og donasyon gikan sa Pagcor nga unta usa ra man kini nga natural nga isyu.

"It becomes an issue kun naa pay pisi unta, if no string attached then that's not an issue" dugang asoy ni Osmeña.

Hinuon andam dawaton sa Cardinal kun ihapak ngadto niya ang tanang mga pagbasol gumikan sa pagdawat og donasiyon gikan sa kita sa sugal apan iyang giklaro nga ang maong donasyon gideretso kini og hatag ngadto sa mga kabus nga maoy nagkinahanglan niini.