Kongreso nagpakita sa ka-arogante: Tomas

Gihulagway ni Mayor Tomas Osmeña nga nagpamatuod lang sa pagka-arogante sa Kongreso ang padayong pagmagahi sa tsirman sa House Committee on Local Government kongresista Emilio Macias nga anhi sa Sugbo ipahigayun ang public hearing sa balaodnon nga pagbuakbuak sa probinsiya sa Sugbo.

Alang sa mayor anhi gyud unta sa Sugbo ipahigayon ang maong public hearing aron mahatagan og katungod ang mga Sugboanon nga maoy apektado ning maong lakang nga makapadayag sa sentimento.

Gipasabot sa mayor nga tipik ug kabahin sa demokratikanhung pang-gobyerno nga makasalmot ang mga Sugboanon sa public hearing ning maong balaodnon.

Gibasol ni Osmeña si House Speaker Jose de Venecia Jr. nga kanunayng nag-uyon uyon sa mga kongresista nga wala magpakabana ug manginlabot ning maong isyu.

Giangkon ni Osmeña nga mao usab kini hinungdan nganong dili siya aktibo kaayo sa partidong Lakas bisan ug loyal siyang misuporta sa administrasiyon ni Presidente Arroyo.

Nasayran nga sama kang Gobernadora Gwendolyn Garcia ug uban pang mga lokal nga opisyal sa Sugbo supak usab si Osmeña sa pagbuakbuak sa Sugbo.

Pagkakaron gihingusgan nila ni Kongresista Antonio Cuenco, Eduardo Gullas ug uban pang mga opisyal nga anhi sa Sugbo mapahigayon ang public hearing sa maong balaodnon.

Nasayran nga nagubot ang milabay'ng public hearing niini didto sa kongreso niadtong milabay'ng semana human mi-resulta kini sa personal nga panaglalis nila ni Garcia ug Kongresista Clavel Martinez.

Nasayran nga si Martinez maoy proponent sa pagtukod ug bag-ong Cebu Del Norte sa kwatro distrito, si kongresista Simeon Kintanar sa Cebu del Sur sa segundo distrito ug kongresista Antonio Yapha alang sa pagtukod og Cebu Occidental sa tresiro distrito.