Kumbera’s karsada, dakong street party karon hapon para ni Gloria

Pagpakitag suporta kang Presidente Gloria Arroyo ipadayag karong hapon pinaagi sa lapad nga street party pagkahuman sa State of the Province Address ni Gobernador Gwendolyn Garcia diha sa Capitol grounds hangtud gabii.

Ang maong kalihukan giduyugan usab sa Cebu City Government pinanguluhan ni Acting Mayor Michael Rama ug mga opisyales sa dakbayan samtang ang kapolisan nangandam na usab alang sa seguridad.

Ang kagamhanan sa Sugbo pinaagi ni City Administrator Bimbo Fernandez moimbitar og mga vendors nga mamaligyag mga lagutmon sa Osmeña boulevard alang sa gipaabot nga libuang suporter ni Arroyo sa Sugbo.

Giklaro ni Rama nga dili kini rally sama sa gihimo sa mga anti-Arroyo didto sa Makati City kun dili usa ka Peace Rally nga tambungan gyud sa 5 mil ka mga kawani sa city hall gawas pa sa mga kawani sa kapitolyo ug ubang sektor.

Samtang si Acting City Police Director Melvin Gayotin mitug-an sa Banat News nga ang mga dalan Escario, Osmeña Blvd.,M.Velez, Kamuning, Ramos Extension, maoy maapektuhan niini.

Gipahibalo ni Gayotin ang publiko nga alas 4 sa hapon sirad-an na ang trapiko sa maong mga dalan nga butangan og mga directional signs sa mga sakop sa City Traffic Office Management (CITOM).

Gawas sa mga kawani sa gobiyerno gipaabot nga ang mga relihiyosong sektor, mga yanong katilingban ug mga kabataan nga misuporta sa pangulo ang gipaabot nga modugok sa kalihukan apan gisiguro ni Gayotin nga daghang kapolisan ang ipakatap sa palibot sa venue aron kalikayan ang kagubot kun dunay mga anti-Arroyo nga mga tawo ang mosamok.

Sigun pa sa mga lokal nga opisyal kini maoy mahimong mensahe didto sa kauluhan nga ang Manila dili ang kinatibuk-an sa Pilipinas ug dili mamahimong ang mga taga didto lang ang magbuot sa kapalaran sa tibuok nasud.

Ang Sugbo maoy mihatag og kapin usa ka milyong bentaha sa mga botos pabor kang Arroyo niadtong piniliay nga gilalis karon sa mga kritiko sa pangulo tungod sa paglugwa sa "Hello Garci tape."