Tulo naangol human nadasmagan sa pari

CEBU, Philippines — Tulo ka tawo ang nangaangol human nabanggaan og sakyanan nga gimaneho og usa na pari diha sa Provincial Road, sa Barangay Pooc, Lungsod sa Sta. Fe, Isla sa Bantayan niadtong Huwebes sa gabii, Nobiyembre 7, 2024.

Ang pari nag-edad og 45-anyos, nagpuyo sa Barangay Argawanon, Lungsod sa San Remegio ug pari sa Roman Catholic Church of Bantayan.

Siya ang driver sa puti nga White Toyota Camry.  Samtang ang mga nabanggaan nga nagmotorsiklo mao sila si Bill Maicor Seared Salino, 24, taga Purok Sudlon, Barangay Suba, Bantayan ; ug  laing motor nga gimaneho sab ni Anthony Illustrisimo Pacinio, 45, taga Habitat, Barangay Maricaban, Santa Fe ug angkas niya nga si Mary Kim Kristine Espinosa Pacinio, 21.

Sa impormasyon sa Sta. Fe Police Station nga usa ka concerned citizen ang nanawag ug nagpahibawo nga dunay nahitabong aksidente sa maong dapit.

Pag-abot sa mga polis gidala na sa Bantayan District Hospital ang mga nangaangol.

Sa imbestigasyon sa kapulisan ang sakyanan ug motorsiklo pareho og direksyon nga gidaganan gikan sa east paingon sa west. Ang sakyanan nagsunod kanila.

Gituohan nga ang pari nakainom, apan walay makakompirmar niini.

Pag-abot sa naasoy nga dapit giingong nabanggaan niya ang duha ka motorsiklo hinungdan nga sila naangol.

Nakagawas ra hinoon ang pari human nga giingong gihusay ra nila ang kaso. — /IBM (BANAT NEWS)