Suliran sa rehab center gihisgutan

Mipatawag og tigom ang Visayas Ombudsman ngadto sa mga opisyal sa siyudad sa Sugbo, kapolisan ug mga state auditor sa Commission on Audit (COA-7).

Tumong sa maong konperensiya ni Deputy Ombudsman for the Visayas Primo Miro pagtuki sa mga kakulian ug suliran sa Cebu Center for the Ultimate Rehabilitation of Drug Dependents kon (CCUREDD).

Nalakip sa gipatawag aron pagtambong sa nahisgotang konperensiya nga gitakda karong Hulyo 14 mao sila si Konsehal Augustus Pe, tsirman sa committee on dangerous drugs sa konseho sa dakbayan, Insp. Pablo Rustico Apolonio direktor sa CCUREDD, Atty. Roy Ursal direktor sa Regional Legal and Adjudication Office sa COA-7, Helen Hilayo, state auditor regional cluster director sa COA-7 ug Josephine Daclan, state auditor nga nadestino sa Cebu City Hall.

Gibutyag ni Pe nga posibleng hisgotan sa mao nilang tigum ang wala ma-liquidate nga P1.7 milyones nga hinabang pinansiyal sa dakbayan gikan niadtong tuig 2001 paubos.

Nasayran nga gikan niadtong miaging tuig hangtod karon padayong gi-hold sa siyudad ang tinuig nga paghatag og hinabang pinansiyal ngadto sa mga pasyente sa maong rehabilitation center nga tag P590 mil gumikan sa wala pa ma-liquidate niini nga gahin sa siyudad.

Nitumaw kini human sa pagpuga sa kapin sa 20 ka mga pasyente sa maong sentro niadtong Nobiyembre 3, 2004 atol gyud sa kalagkalag nga gireklamo sa mga pasyente ang kuwang nga pagkaon ug pagmaltrato kanila ug nasundan pa ang maong pagpuga niadtong Lunes sa milabay'ng semana.

Nasayran nga gigahinan lang og tag P30 ang adlaw sa Dangerous Drugs Board (DDB) ang matag pasyente sa maong sentro ug ang mga ginikanan matag usa kanila nagbayad usab og tag P2,500 ang bulan.