Mga saksi ni Sara
Karong nagkaduol na ang adlaw sa paghukom sa senator-judges sa iyang impeachment trial, angayng hinuktokan ni Bise Presidente Sara Duterte nganong pulos nisimang ang mga saksi nga ilang gipatawag aron pagpanalipod niya:
•Unang saksi, Atty. Ralph Sarmiento, nga pabor ni Sara ang mga komentaryo sa social media, nisugot dihang gi-istorya sa defense panel pero nibalibad sa supina sa impeachment court;
•Ikaduhang saksi, Davao City Assessor Jaime Adalin, wala kaseguro sa nahimutangan sa yuta ni Sara sa Matina Crossing ug nganong nahalin og ?6 milyones pero gideklarar sa statement of assets, liabilities and net worth (SALN) ni Sara nga P10 milyones;
-o0o-
•Ikatulong saksi, Samal City Assessor Kenneth Enumerables, naglibog nganong ang yuta ni Sara sa Barangay San Isido gilista sa SALN sa Matanog (walay Matanog sa Samal) ug nganong P3.45 milyones ang gibutang sa deed of sale pero P4.04 milyones ang gibutang ni Sara sa SALN;
•Ikaupat nga saksi, Davao City Accountant Vingelin Bajan, wala kahinumdom nga konektado diay sa accounting firm nga ni-audit sa mga kompaniya ni Sara, gawas nga wala nang kaila sa iyang kaugalingong pirma;
-o0o-
•Ikalimang saksi, GenCorp Corporate Counsel Suzette Balucanag-Punay, nibisto nga nakadawat si Sara og P2.14 milyones gikan sa kompaniya nga wala niya panag-iyaha, dihang bise presidente na siya sa 2022 hangtod 2025;
•Ikaunom nga saksi, Anel Martin Antero, niangkon nga P205,000 ang nabayran ni Mans Carpio sa ilang panihapon sa Ginza sa Tokyo, Japan, pero wala kahinumdom sa P580,000 nga iyang nadawat gikan ni Mans sa Hulyo 2020 (segun sa records sa Anti-Money Laundering Council, AMLC);
-o0o-
•Ikapitong saksi, Chadrin Parian, niangkon nga P256,882.50 ang balor sa 24 ka paresan sa sapatos nga gikompra ni Mans sa Malaysia para sa basketball players ug ilang mga ginikanan; ug
•Ikawalong saksi, Rainer dela Fuente, wala molalis sa dakong kang-a sa SALNs, bank accounts, income tax returns ug corporate records nilang Sara ug Mans, nidayeg sa forensic financial expert sa prosekusyon, Atty. Alex Cabrera, ug igo lang nikuwestiyon nganong gihatagan si Cabrera og kopya sa confidential nga reports sa AMLC (nga hagbay rang nahukman sa impeachment court nga mahimong ablihan sa impeachment cases).
- Latest
















