Eala sunod na hahataw sa Hong Kong Open

MANILA, Philippines — Matapos ang bigong kampanya sa Tokyo Open, target ni Alex Eala na rumesbak sa Hong Kong Open na lalarga sa susunod na linggo sa Hong Kong.
Galing si Eala sa quarterfinal finish sa Tokyo Open kung saan lumasap ito ng 2-6, 7-6 (5), 6-4 kabiguan sa kamay ni No. 3 seed Diana Shnaider ng Russia.
Ito ang ikalawang sunod na pagkakataon na natalo si Eala kay Shnaider.
Una na noong nakaraang linggo sa Ningbo Open sa China nang itarak ng Russian netter ang 7-5, 6-4 panalo kay Eala sa Round of 16.
“Both of us could take the match to a really, really high level. I’m proud of that despite the loss, but I do think I had my chances. Next time, hopefully do better in those moments,” ani Eala.
Nagpasalamat si Eala sa mga Pinoy fans na patuloy na sumusuporta sa kaniyang mga laban lalo pa’t isa ang Japan sa mga paborito nitong lugar.
“To be in front of the crowd and to play in this atmosphere is always super special. I love Japan as a whole, whether I’m here for tennis or not, so I really had fun,” ani Eala.
Target ni Eala na magkaroon ng magandang pagtatapos ang kaniyang kampanya sa taon na ito.
Ang Hong Kong Open ang pinakahuling torneo na lalahukan ni Eala sa WTA Tour.
Sa kabila ng dikit dikit na kamalasan sa nakalipas na mga torneo, nanatiling mataas ang moral ni Eala.
“I’m super excited, and I’m going in with high motivation. I’m trying to put my reflections off for one more week because of said motivation. Check back in a week,” ani Eala.
Matapos ang Hong Kong Open ay makakapagpahinga ng mahaba si Eala.
- Latest






















