Pagsuway sa AI
Haskang ilara nako. Puwerte nakong biliba pagkadungog sa bag-ong bersiyon sa “Dandansoy” nga gikanta sa Asin. Bulhot ug parayegon ang vocals ug masaligon ang electric guitar. Nihangyo ang akong asawa nga hatagan siya og link kay maoy usa sa labing unang kanta nga nakat-onan og sista.
Naglibog ko diin madunggi. Wala sa YouTube. Ang bersiyon sa Asin sa Spotify giduyogan og accoustic guitar ug pagaw nga Lolita Carbon ang vocals. Nakit-an nako sa Facebook. Duna bay bag-ong bokalista ang Asin? Pero niingon ang Google nga walay bag-ong recording sa “Dandansoy.”
* * *
Maong nangutana ko sa viewers sa programang Baruganan. Si Ka Bino Guerrero ug ubang nakabati nitubag dayon nga dili Asin kon dili artificial intelligence ang responsable. Naglibog sab sa sinugdanan hangtod nakapaminaw sa susamang AI remakes sa mga kanta nilang Fredie Aguilar, Aegis ug uban pa.
Nakahinumdom kong Edison delos Angeles nga nipakita nako sa abilidad sa Suno app. Gi-record niya sa telepono ang tingog ni Atty. Ina Magpale dihang nag-abot mi og paniudto. Human sa pipila ka gutlo, gipabati niya nga duna nay bag-ong kanta si Atty. Ina.
* * *
Napukaw ang akong damgo paghimo og kanta. Dunay lyrics pero dili kamao mohimo og tuno. Maikog mosamok sa akong higalang composers. Apil nang Edison nga bag-o lang nigradwar sa abogasiya ug nagplanong mokuha sa Bar sunod tuig.
Bugtong higayon nangahas og pakita sa akong lyrics ngadto ni anhing Dr. Jose “Sir Dodong” Gullas. Kinsa nihangyo ni anhing Maestro Mil Villareal paghimo tuno. Maong natagik ang “Awit ni Dodong” nga gikanta sa University of the Visayas (UV) Choir.
* * *
Pag-download nako sa Suno app, giawhag ko pagpangita og hilom nga suok aron maka-sampol og kanta. Gikanta nakong “Yesterday” ug sa makausa pa napahinumdoman nganong dili angayng mangahas pagkanta sa publiko.
Dihang nangayo ang app, lyrics sa “Awit ni Dodong” ang akong gihatag. Human lang sa pila pamilok nakahimo og duha ka bersiyon. Nga pulos gikanta sa akong tingog. Nga dili yabag. Kon mobayad ko sa pro version, nipasalig ang Suno nga mahimo nang mabaligya sa Spotify, Apple, YouTube Music ug ubang plataporma. Pero dili kong kaseguro mohangop ba sa AI version silang Sir Dodong ug Maestro Mil.
* * *
- Latest
