Campus violence

Nagkagrabe na kining problema sa school violence sa Pilipinas karong panahona. Gani dinhi sa Sugbo, daghang tulonghaan ang nabiktima sa nga hulga sa kagubot nga nakahatag og tumang kahadlok sa mga estudyante.

Ug angay na gyud kini nga tutokan sa otoridad. Kay kon magpadayon kining klase sa problema, basin kon mahisama ang nasud sa mga western countries nga uso na ang mga pagpamusil sulod sa mga eskuwelahan.

Katapusang insidente sa pagpamusil sa tunghaan ang nahitabo didto sa dakbayan sa Zamboanga dihang usa ka tinun-an ang nakasulod sa iyang eskwelahan dala ang armas ug namusil nga mikalas og usa ka kinabuhi.

Hinuon, dinhi sa Sugbo, walay insidente sa pagpusil sulod sa tunghaan sama sa ubang lugar na nasud. Apan daghang hulga ang mihasol sa mga eskuwelahan sa lalawigan sulod na sa pipila ka semana.

Dili tiaw kining mga bayolenteng panghitabo sa mga tunghaan sa nasud karon. Mao nang angay lamang mohimo og seryoso ug dinalian nga aksiyon ang otoridad, ilabi na ang nasyonal nga kagamhanan.

Nagpakita lamang kini kon unsa na ang kalidad sa atong kabatan-onan karon. Gani, dali ra silang maipluwensiyahan sa mga butang niining panahon sa modernong teknolohiya nga sayon ra nilang makab-ot.

Daghang rason sa pagsulbong sa mga campus violence sa nasud karon. Ug usa na niini ang walay habas nga pagsagop sa social media sa atong kabatan-onan nga maoy nagtukmod kanila pagbuhat og mga butang nga dili maayo.

Manghinaut lamang kita nga maaksiyonan sa kagamhanan kining seryoso nga problema sa labing daling panahon. Kini aron kapugngan ang umaabot nga mga dugoon pang paghitabo sulod sa mga tunghaan.