24 ka detention ponds sa Monterrazas operational

CEBU, Philippines — Gipahibalo sa Mont Property Group nga operational ang 24 ka detention ponds sulod sa Monterrazas de Cebu nga adunay kinatibuk-ang kapasidad nga 62,710.5 cubic meters alang sa pagtipig og tubig sa uwan diin labaw pa sa doble sa 26,701 ka cubic meters nga gikinahanglan ubos sa giaprobahang drainage ug flood mitigation plan sa siyudad.

Ang detention pond system maoy sentrong bahin sa flood mitigation infrastructure sa Monterrazas nga gidisenyo aron mosawo, mopugong ug modumala sa dagan sa tubig uwan samtang motabang og pakunhod sa pressure sa tubig sa drainage network.

Nikabat ngadto sa P60 milyones ang nagasto sa developer alang sa rehabilitasyon sa tibuok usa ka kilometro nga Quijada Road ug pag-upgrade sa drainage system nga nahuman niadtong Abril 2025 sa wala pa moigo ang bagyong Tino.

Gi-upgrade usab ang 450-millimeter drainage line sa Guadalajara ngadto sa 1,500-millimeter reinforced concrete pipe sulod sa 200 metros nga nakadugang sa kapasidad sa drainage sa gibana-bana nga 1,000 porsyento.

Gipahigayon usab ang independent drainage study human sa bagyong Tino nga nagtumbok sa Guadalupe Heights ug Guadalajara isip mga lugar nga dali nga bahaon tungod sa kakuwang sa natural nga pagdagayday sa tubig diin nagkinahanglan ang proyekto og pumped drainage stations nga nikabat ngadto sa P50 milyones. Nagpatukod usab og pumped drainage station sa Guadalupe Heights uban sa homeowners’ association diin human sa bagyong Tino gidoble ang kapasidad sa mga pumped drainage station gikan sa tulo ngadto sa unom ka unit ug napamatud-an nga nakatabang sa pagpamenos sa pagbaha atol sa kusog nga uwan niadtong Hunyo 3, 2026.

Giplanohan usab nga magbutang og laing pumped drainage station sa Guadalajara diin buboan kini og P200,000 alang sa Racal collection unit sa Barangay Guadalupe aron mapalambo ang koleksiyon sa basura ug malikayan ang pagbabag sa mga drainage.

Si Marie Camille Bondad, General Manager sa Mont Property Group nagkanayon nga ang pagkompleto sa detention ponds kabahin sa ilang padayon nga paningkamot aron masulbad ang mga kabalaka sa pagbaha, mapalig-on ang pagdumala sa tubig baha ug matuman ang mga regulasyon nga gimando sa konseho. Gikataho nga ang tanang flood mitigation measures padayon nga gi-monitor pinaagi sa regular nga compliance reports nga gisumite ngadto sa Environmental Management Bureau (EMB)-7 uban sa mga kopya nga gipadala usab ngadto sa konseho ug Barangay Guadalupe. BDB BANAT NEWS