Tanker, wing van nadisgrasya

CEBU, Philippines — Duha ka mga aksidente sa kadalanan ang natala nga niresulta sa pagkaangol sa tulo ka tawo kagahapong adlawa, Huwebes Hunyo 25,2026

Sa aksidente sa Minglanilla, nadasmag ang usa ka tanker truck sa mga poste sa kilid sa dalan ug sa usa ka lugawan ug puto sa Barangay Tunghaan, Minglanilla alas-3 sa kaadlawon.

Swerteng wala nakabantay ang tindera, apan laing tindera sa katupad nga tindahan ang nalapwaan og ininit nga tubig hinungdan nga gidala sa tambalanan.

Ang drayber gidala sa Minglanilla Police Station alang sa dugang imbestigasyon sa nahitabong aksidente.

Sa laing aksidente, naangol ang usa ka truck driver ug iyang helper human natumba ang ilang gimanehong wing van nga kargado og mga materyales sa konstruksyon  diha sa Trans-Central Highway (TCH) sa Barangay Gaas, Balamban alas 10:30 sa buntag niadtong Miyerkules, Hunyo 24.

Ang driver giila nga si Winnie Lambayong, 32, samtang ang iyang helper mao si Benzer Laquinon, 21, parehong residente sa Barangay Pelesa, Escalante City, Negros Occidental. Gikan sa Escalante City ang wing van ug padulong unta sa Bohol apan nabiyaan sa ilang convoy maong nasaag paingon sa Transcentral Highway ug nagsalig na lang sa navigation application kay una pa ning higayon siyang nakaagi sa maong rota.

Pag-abot sa usa ka kurbadahong dalan sa Barangay Gaas, nikagar ang brakes niini hinungdan nga nawad-an og kontrol ang driver, paingon ngadto sa daplin sa karsada ang wing van, natagak sa kanal ug mitagilid.

Daling gidala sa Cebu Provincial Hospital-Balamban ang duha ka biktima tungod sa ilang mga samad.— IBM BANAT NEWS